"Ang bitter-sweet side ng buhay"

                    Kilala ako ng pamilya at mga kaibigan ko bilang isang “Sweets Addict” dahil sa sobrang pagkahilig ko sa pagluluto at pagkain ng mga matatamis na pagkain. Hindi lumilipas ang buong isang araw na hindi ako nakakakain ng kahit anong uri ng pagkain na matamis. Bilang parte na ito ng buhay ko mula pagkabata, maaaring masabi kong malawak na ang kaalaman ko sa mga lasa ng karamihan sa mga desserts o pastries. Sa dami rin ng mga desserts,pastries at delicacies ngayon, ang hirap sabihin kung alin sa mga iyon ang paborito ko dahil lahat ay masasarap at lahat ay malapit sa aking taste buds. Pero siguro kung tatanungin ako kung ano ang pinaka hinahanap hanap ko, masasabi kong ito ay ang Chocolate Torta delos Reyes ng Aristocrat. 



                    Para sa akin, hindi ito maituturing ordinaryong cake sapagkat sa disensyo’t lasa pa lamang ay may pagkakaiba na sa karamihan ng cake na makikita sa bakeshops ngayon. Hindi rin ito basta basta matamis lang at hindi lamang isang chocolate cake na matatawag. Makintab na dark chocolate ganache ang bumabalot sa buong cake na ito na may disenyong chef sa ibabaw mula sa tinunaw na puting tsokolate. Kapag nahiwa na ito, sasalubong sa iyo ang mistulang katakam takam na chess board. Ang chess board na ito ay puti at itim na tsokolate na may maninipis na egg wafer sheets. Pwede ring mahalintulad ang chocolate wafers nito sa KitKat na pinalamig sa freezer. Masasabi ko ring parang ice cream cake ang Torta delos reyes dahil pagka nalagay ito sa mainit na temperatura, ang lambot nito ay parang ice cream na nakalabas sa freezer ng sampung minuto. Pagka naman nasa ref ito ay dali daling tumitigas. Gustong gusto ko ang cake na ito dahil nakakapag angat ito ng mood dahil na rin siguro sa serotinin, isang anti depressant dahil sa dark chocolate na sangkap nito. Ito rin ay may antioxidants kaya naman napaka comforting talaga pag aking nilalantakam! Ayon sa pag-aaral, nakakapagpababa rin ito ng blood pressure at kolesterol na masama sa ating puso. Sinasabi nila na nakakataba ito ngunit kahit kumonsumo ka ng dalawang slice nito sa isang araw, may mga fats ito na mabuti para sa ating katawan gaya ng Oleic Acid, Stearic Acid at Palmitic Acid. May 17%-22% din ito ng protina. Mabibili ang Torta delos Reyes sa halagang P85 kada slice. Maaari rin namang itong bilhin ng isang buo na nagkakahalaga ng P400 pataas. 



                    Bilang nangangarap na chef at bilang isang taga hanga ng mga tanyag na pastry chef, sobrang hinahangaan ko ang pagiging matagumpay ng gumawa ng Torta delos Reyes dahil sa ganda at sarap ng kanyang pinaghirapang produkto na hindi basta basta nagagaya ng iba.Pinakikita nito na kahit gaano kahirap gawin ito, isang matamis na tagumpay naman ang maibibigay nito sa mga taong hinahanap hanap ang sarap nito. Maihahalintulad ko rin ito sa bawat personalidad at pagkatao ng bawat isa sa atin na may kanya kanyang uniqueness sa pagharap sa buhay mapa itim o mapa puti. 

by:Amethy Rose A. Casal(^_^)