Tara Na't Tikman Ang Lasang Di Malilimutan.

Kare-kare <3

          Minsan lang kung maghanda at magluto ang aking ina ng mga bongga at masasarap na putahe. Dahil ito sa kadahilanan na madalang lang din kami mabuo na pamilya – isang beses lang sa isang linggo. Tatatlo na nga lang kaming mag-anak, hindi pa kami pwedeng mapirmi lang sa bahay. Kaya’t bawat minuto na magkakasama kami, sinisiguro ng aking ina na magkakaron kami ng masayang salu-salo sa hapag-kainan. Nang minsang dumalaw ang aking tiyahin at pinsan sa aming bahay, naisipang magluto muli ng aking ina ng kanyang specialty na kare-kare. Isa lamang ang kare kare sa mga putaheng magaling at masarap siya kung magluto. Di makakailang gugutumin ka talaga sa pagtingin pa lang dito kahit na hindi ka gutom. At kung talagang, duling ka na sa sobrang gutom, isang tikim mo lang nito’y maaari mo ng malimutan ang iyong pangalan. Mas sumasarap ang luto nyang kare kare kapag sinasamahan ang pagkain nito ng bagoong na kadalasang siya rin ang nagluluto’t gumagawa. Nilalagyan niya ito ng liver spread para naman kahit papano’y magkaroon ito ng simple touch mula sa kanya.

          Ang Kare-Kare ay ginawa mula sa sarsa ng mani na may iba't ibang mga gulay – nilagang oxtail, karne ng baka, at paminsan-minsan offal o triplet. Madalas Ito ay kinakain na may bagoong, kung minsan ay hinahaluan ng sili, at winiwisikan ng calamansi juice. Ayon sa kaugalian, ang anumang mga Filipino fiesta ay hindi kumpleto nang walang Kare-Kare.

          Hindi ganun karami ang mga kailangan sa pagluluto ng isa sa mga paborito kong putahe. Medyo may kamahalan lang siguro ang pagbili ng sa karne ngunit sulit naman ito dahil para ito sa ikasasarap ng Kare-kare. Meron itong mga halo na piling mga gulay na nagtataglay ng iba’t ibang bitamina na kailangan natin sa ating araw araw na pamumuhay. Sa aking palagay, mas maraming mga gulay ang nakahalo sa nasabing putahe dahil ito mismo ang nagpapasarap dito. Kailangan lang talaga ng tiyaga at pagpupursigi upang mahuli ang saktong sarap na swak sa panlasang Pilipino :)

Minsan ay maganda ring paglutuan at paghandaan ang ating pamilya ng isang ulam na alam na bagama’t may kamahalan, alam naman nating ikasisiya ng bawat kasapi ng mag-anak. At para na rin maiba naman ang pang araw araw na pagkain nila bago pumasok sa eskwela o sa trabaho. Likas kasi sa ating mga Pilipino ang hanap hanapin ang lasa ng mga lutung bahay. Sa ganitong paraan, kahit paano’y magiging espesyal naman ang salu-salo ng isang pamilya sa hapag kainan.

  

- Yna Kasandra Salamat